Tuesday, August 2, 2016

සන්දනම් 

කෙටි දිනකදි 
ඔබ මුණ ගැසි 
ඔබෙ භූමිය මට හුරු විය 
ඔබ හා  බැදි 
ඔබෙ සුව විදි 
ඔබේ දෙනෙතින් මා සිහි විය 

දමිළ අකුරු 
අපට ම හුරු 
ලෙසින් ගෙතිනි දී ගරුසරු
අප සොහොයුරු 
හා සුමිතුරු 
මියැදි  ගියෙද නොයෙනා තුරු 

ඒ මාවතෙ 
ඔබ හාමතෙ 
කෙලෙස ගෙවුනෙ ගිනි රාත්‍රියෙ 
වෙඩි හඩ මැද 
ඔබ ඇදුනිද 
ලේ පැල්ලම් හා මිය ගියෙ 

මා  දුටු කල 
ඔබ අභියස 
ඔබේ ගිනිදැල් නිවුනෙ කෙලස 
මට රහසකි 
වැටහෙන්නැති 
නො නැවතීම සිහිගන්වති 

මතු දිනෙකදි 
එක පැතුමකි 
එක සේ එන යළිදු නො යෙන 
උතුරේ ඔබ 
දකුණේ මම 
හමුවූ දින සිහි ගන්වන 

වෙඩි උණ්ඩය 
දුන් ශබ්දය 
තව ඇසේද ගෙවෙන දවසෙ 
ඒ මතකය 
මට සිහිවිය 
අද කවියට නැගෙන සවසෙ 

යළි එන්නම් 
පවසන්නම් 
කෝවිල් බිමෙ සන්දනම් 
මල් ගන්නම් 
තෙල් ගන්නම් 
පූජාවක සිහිනගම් 

හිනැහෙන්නම් 
සැනසෙන්නම් 
ඔබ යනෙනා දෙස බලන් 
යළි එන්නම් 
ලග ඉන්නම් 
මතු හමුවන දින කියන් 

Thursday, July 28, 2016

https://youtu.be/7jvMFLImLWk
සරත් ඉද්දමල්ගොඩ පියනම සමග කළ සාකච්චාවකි 
කෙලස කියම්ද දෙවියන් ගැන 




ඇදෙයි වීදි වල උන් 
ගෝනි මලු උස්සා 
විටෙක දැනෙයි දැන් 
වැටේවිද පය ලිස්සා 
කුමක් කරම්ද, උන්ගේ දහදිය දැක 

විෂමතා ගොන්නක 
හිරවී සිටිනු දක්නා 
ඇසකුත් නැති හැඩයි 
ඒ ජිවිත රක්නා 
දෙවියන් ගැන කුමන බස්ද, 
නැත ය සුභ අස්නා

තෙල් පහන් මල් පිදෙයි 
බුදුන් දැක ගන්ටා 
පෝ දිනෙක බණ ඇසෙයි 
පිරිත් පැන් දෙන්ටා 
පොහොසතුන් දැන් සොයයි 
පින් ගහේ  සෙවනටා 
දරුවකුව කරගහන් 
ඇදෙයි විකුණන්ටා

අහසටම   මාළිගා 
තැනෙන හැම නගරේ 
සුවපහසු බව  දැනෙයි 
සිසිල දෙන කාමරේ 
පැල්පතට ගරහමින් 
නිතින උන් කොන් කෙරේ 
දෙවියනී ඔබ කොයි ද 
නො පෙනෙන මේ කතරේ 

තවත් නො හැකි ය 
ඔබ ගැන කියනට 
උන් මැරෙන හැම දවසක ම 
රත් වූ පොළොවත්  
දවයි  ඉමක් නැතිව 
දඩුවමක්  සේ ලුහුබදින 
ඉරණමක් ගසන කරලම් අභියස 
නො හැකිනම් කෙනෙකුට 
තවත් මේ ගිනි උහුලනට 
ඔබම එනු මැන 
මේ අහස්  ඉම පලාන 
මට නො හැකි දෑතට 
දැන් සවියක් වන්නට .

Tuesday, July 26, 2016

 07 එනු මැන දේව මාළිලිගවට ම - පූජාව මෙහි යැ 




ගලක් පිට ගලක් නැතිවූ 
ජෙරුසලෙම් දෙව් මැදුර දෙස 
බැලූ කෙනෙක් සිටිම්ද ?
සිටීනම්, ඇයි මේ 
පණත්  පිට පණත් 
අණක් පිට අණක් 
ඒ, යා වීමට ද    
වන්දනාවේ පිළිවෙතට
 
වන්දනාව නොදකින දෙවියන් හා 
සුගන්ද දුම් පූජා හා 
බිය දනවන මෙහෙයකි දේව 
දෙවියන් පවා බිය වී -ක්ලාන්ත වී සිටියි 
වෙන්නේ කුමක් යැයි සිතමින්
මුහුණු මැළි වී කිම 
අවමගුල් පිළිවෙතක් සේ 
කිම්ද කරණා, නො වැටහේ මට 

වන්දනාවකි-මාළිගාවකි  
හැගුම් කිසි නැති, දේව මෙහෙයකි 
භක්ති දනවති- එහෙත් එය නැති
රැලේ හසුවී , අපිත් ඔහෙ  යති 
අන්ධ වී ඇති - කිසිත් නො කියති 
මන්ද කාරණා ඇසූවෙක් නැති 
වන්දනාවකි - මාළිගාවකි 
පුදන්නත් නැති පිදෙන්නත් නැති 

අතරමන්        රැළක්
අතරමන් කල කලක් 
ගොඩ නොවන වළක්
ගොඩ නොවන වගක් 

නාසරතයේ ජේසුස් 
ජෙරුසලෙම් මාළිගාවේ 
ඔප්පු කළ කිනම් පූජාවක් ගැන, 
අසා ඇත්තේද........
සිදුවූ වග ඔහුගේ යාගය 
ජෙරුසලෙමෙනුත් පිට 
පසක් කරනෙමුද යළිත්, අන්ධ වූ මේ පිරිසට;
පව්කාර අයකැමියගේ  යැදුම 
දෙවියන්ට වැටහුනි නම් 
නූතන පරිසි හදවත් 
නො දන්නේද ඒ බයිබලීය පුවත 
නො දන්නා කමද- නො දන්නා සේ සිටිම්ද?

දුගියා ගේ ගමන් මළු 
දින දිනම බර වී 
උරපතු පහත්  වී ගෙවී 
උන් දැන් හෙම්බත්   වී 
දෙව් විමනේ පූජක තෙම 
නො දකීද ඒ දිළිදු කම 
ඔප්පුකරන කල, දුම් උතුම් පුජා 
දුගියා ඇදෙයි වීදිවල 
වැටෙනතෙක්  බරඋස්සා-පය ලිස්සා 
ගැහෙන සද පීඩිත දෙපා දුර්වලව 
උන් කෙසේ යම්ද 
මාළිගාවේ පුජාවට 
පූජක තෙම්ගේ-අණ පණත් රක්නට........

බැටළුවෝ හෙම්බත්ව වීදි වල 
පූජක දුම් පුජා සුරපුර වල 
අණ රකින්ට යනු කියයි 
දේව මාළිගයට 
සුගන්ද දුම් දකිනට 
අනපණත් රකින්ට 
ඒක පුත්ගල වන්දනාවට......!
පූජාව එහි ය  
පූජා නො වී පූජා ගැන කියන 
පූජා  ගැන දෙසන 
භක්ති දනවන යැදුම්, ශාන්ති කාර්ම සේ 
මුමුණයි, මතුරමින් තොල් 
දෙවියන්ට නො ඇසෙන්න 
ඇසුනොත් කෙළවරයි, ඒ දුම් පූජාව 

'පූජාව මෙහි ය-ඉරිදා මෙහෙය'
අණකි පැවරෙන 
සැවොම යන එන 
පහන් ගෙන මල්ද ගෙන  
යදින්නේ පොත් බලාන 
පිරිසකි වීදිවල 
හිස් දෑතේ කරගැට පිපෙන 
නැතිය පහනක් හෝ මලක් 
උන්ගේ දහඩියෙ විමුක්තියට 
තේ කහට උගරකි සුවය දෙන 
මහපාරේ බත්පතකි  කුස පුරවන 
යදින්නත් නැති මාලිගා නැති 
පූජා ද නැති වන්දනා නැති 

එහෙත් බලනු;
පැය විසිහතරේ දුවන සෙල්ලමක 
උන්  පුජා  වෙති 
කාසි සොය යති 
දුක් ගින්නක් නිවති 
දුක් කදුළු පිසති 
අස්වැසිල්ලක් වෙති 
අසල්වැසියෝ ද ඇති 
එහෙයින් උන් අතර 
ලෙවියෝ නැති-පූජකයොත් නැති 

මෙහෙව් වීදියක් 
නො වම්ද මාළිගයක් 
දෙවියන්ට අල්තාරයක් 
පිදෙන යාගයක්-පුදන  යාගයක් 
සුගන්ද දුම් නැත 
සේවයකි යස 
අසල්වැසියා වෙත-සමරියෙක් ඇත 
නව කල්වරියකි පීඩිතයගේ 
පිඩකයට එරෙහිව 
මාළිගා නැති පුදබිමක 
සේවක වන්දනාවකි 
දෙවියන් දකින්නේ 
අනෙකා  තුළින් ම  ය
අනෙකා  සමග ය
අල්තාරය අනෙකක් නොව 
විදියේ දුවිලි අතර 
දුගියාගේ දහදියෙන් තැනුනකි, වීරියෙන් තැනුවකි 

මාළිගාවෙන් පිට ය 
මාළිගාවෙන් තොර ය 
දූවිල්ලට සම ය 
දහඩියට රුචි ය 
එහෙයින් දෙවියනි.......!
මෙන්න නව කල්වාරිය 
ඔබේ යාගයට විකල්ප කුරුසිය 
දුම්ද නැති මල් ද නැති 
දිළිදු පැල්පත 
යළි උපදින්න සුදුසු ගවලෙන 
මෙය දමා යන්නේද ඔබත් 
මාළිගාවට, අවමගුල් පිළිවෙත් බදු 
වන්දනාවට,වන්දනාවක .

Friday, July 22, 2016

 නැවතුනු ප්‍රේම කතා කොයිබද ................? 




ප්‍රේම කතා නවතා 
බලමු අවට ඇස්  ඇර කිව්වද 
නැවතුනු ප්‍රේම කතාවක් නො මැත -ප්‍රිය මිතුර 
නැවතුනේ කොතනද, නවතා කලදේ කිම්ද 
දකිනූ රිසි වෙමි -එහෙයින් අදටත් 

දිළිදුන්ගේ කුසගින්න - දැවෙනා සතියක ම 
ඇස අග කදුලු බොදවී යනෙන  දින     කිම 
මා දුටු අළු දූවිලි  කලේ නම්           අරුම
කොයි දිසාවක නැවතුනේද අමුතු      ප්‍රේම 

නො තේරෙන බසකි 
නැතිබැරිකම් ගැන දොඩන 
අවට ඇස්  බලනට -යන්නේද සති ගණනක් 
පද ලියවෙන කල ගේය සේ සත්සර හා 
හඬකට හසුවී අපද අසනෙමු - එම ගී මුමුණා
එනමුත්, නැවතුනු ප්‍රේමය කිම....? 
පීඩිතයා දෙස බැලූ, දෙනෙත් කිම 

පීඩිතයා වෙර දරයි 
ජයගන්නට දිනෙක සිය නැතිබැරිකම් 
එය දුටුකල ගැයුවෙනම් දෙදෙනෙක් 
'ඔරුවක් වී - ඒ ජීවන මග හා යාවන්නට'
පැදගිය ඔරුවක්ද නැත 
ගැයූ දෙදෙනාද නැත 
නැවතුනු ප්‍රේමයක්ද නැත.........

දිළින්දාත්, පීඩිතයාත් එක සේ බැට කයි 
පිඩකයාගේ ප්‍රේම කතා 
ගේය පද හා සත්සර මුසුවුණු 
කෝමල ගී අභියස - තොල් සෙලවෙන  කල 
අර්ථ ශුන්‍ය සිහින දේශයක 
වර්තමානයත් සුව  නින්දක 
අනාගතය ගී පද වී, සත්සර  සොයන  කල

නැවතුනු ප්‍රේමයක්    නැත 
පැදගිය ඔරුවක් ද   නැත.

Tuesday, July 19, 2016

ඉතින් නුබලාට අවශ්‍ය සිද්ධි නම් ..................


පත්තු කෙරුවේද ඊළග වෙඩිමුරය 
තවත් කළු ජූලියකට 
අලු දූවිලි වන මිනිස් ඝාතන දකිනට 
වටින්නේද පුහු සාම්ප්‍රදායික නැටුමක් - නුබලාට 
තවත් ඇරබුමකට - ජූලියක් කළු  කරනට 

'තල්රුපපා සෙවන' 
තවමත් හෙණයක්ද සිහලුනේ තොප හට
හීනමානයේ අවි රැගෙන 
කෙරූ තුවක්කු සෙල්ලම
නො සෑහේද දැවෙන වෛරයේ ගිනි අභියස 

ඉතින් අවැසිද තව සිද්දි තොප හට  
ලියන්නට දකුණේ තීරුලිපිවල 
අවුලා ගිනි යළිත් -  වනසා යාල්පාන පුදබිම

'ගහපියව් කොටපියව් ,ඕකුන්ව'
බුදුදහමේ අලුත් පිළිවෙතද මෙය 
සිල්සමාදම් වී පෝ දින 
අංගුලිමාල වෙස් ගෙන කිම...........! 
රත්වෙන දකුණේ බුද්ධත්වය 
නිවන දකින්නට සැරසෙන්නේ -අවි අමෝරා ගෙන නම් 
කොටහන් පච්චයක් - අධිරාජ්‍යවාදී දකුණේ 
පපු කුහර පසාරු කර 
අවසිනම් තවත් සිද්දි තොප හට 

සත්ව ඝාතන හෙලා දකින 
සිහළ  බෞද්ධ කම 
මිනිස් කම නැසුවේ කිම කියනු මට 
උතුරේ වැලලූ දහස් හදවත් ගොඩ ගෙන 

කාපට් මාවතේ සැගවූ 
උතුරු ලේ සිත්තම් - සිහිගන්වයි අදටත් 
රණවිරු කෙළිකම්, රජකම් , ජඩකම් 
ඉතින් අවැසිද තවත් සිද්ධි තොප හට 
කොටන්නට- මරන්නට - දකින්නට 
ඇවිලුනු දමිළ කළු හම 
තනමින් ජයකෙළි ස්මාරක 
හසලක පිළිරුවටත් උඩින් 
අලිමංකඩ හෝටල් රාජ්‍යයේ 

දවසේ වෙහෙසී ඉපයූ සොච්චමින් 
හදාගත් ගේ පැලේ 
මේසපුටු හොරාගත් දකුණේ සෙල්ලම
රීප්ප අහිමිවූ  රාත්‍රිය 
කාට කියම්ද උන් දැන් 
උතුරේ හෝටල්කරණයේ 
මුල් ගල තැබු කල  -රණවිරු දෑතින් 

මෙන්න සිද්ධි තොප හට - ලියන්නට, කියන්නට 
කවන්නට කිරිබත් - ලුණුමිරිස් රස සමග 
තොපගේ දරුවන්ගේ - සිංහල සිතුවමකට 
පාට තවරයි උතුරේ මියැදෙන උන්ගේ 
අසෝබන රූපය 

පොරවහන් එහෙයින් 
චීවරයක් ශිව දෙවියන්ටත් 
ඝන්ටාර නාද මැද්දේ 
මල්පුජා සිල්පද සද්දේ 
ලියමින් සිද්ධි එකතුකර 
නටමින් 'උඩරට පහතරට'
අවසිසේ - රිසිසේ  
දමිළ හදවත් නො දන්න - තවත් එක් රාත්‍රියක.

-------------------------------------------------
* 2016 ජුලි මස, යාපනය විශ්ව විද්‍යාලයේ විද්‍යා අංශයේ සිංහල සිසුන් තම සම්ප්‍රදාය රකින පටු නියාවන් හේතු කරගෙන, දමිළ සිසුන් හා ගැටිනි. එයට දකුණේ බුද්ධි අංශ එකහෙලා ම සහය දී ඇති අතර, මෙම ගෙටුම ඉදිරියේදී 
තවත් සුවිසල් ගැටුමක පෙර ලකුණු දනවන්නකි.  දකුණේ වීරකම් උතුරේ කීයාපාන සමයක, මෙවන් කලහකාරී සිද්දි 
බලා සිටිනවාට වඩා, ඒවා වලක්වන ක්‍රමවේදයක්  ඇත්නම්, එය දමිළ ජනයාගේ ජීවන අයිතය තහවුරු කිරීම වන වග දනවන්නට මෙය ප්‍රයත්නයකි. තවත් උතුරේ වෙඩිහඩ ඇසෙන රාත්‍රියකට ඉඩ නො දී, සංහිදියාවේ පෙර ගමන් කරුවකු වන මෙන්, මම ඔබෙන් ඉල්ලමි-නිහතමානිව.

Monday, July 18, 2016


මගේ යාගය


එක් රාගයක් පමණි  ගැයෙන්නේ -මේ දැන් 
එක් රාවයක් පමණි ඇසෙන්නේ  - මේ දැන් 
එක් හීනයක් පමණි දකින්නේ     - මේ දැන් 
ඒ ඔබ ගැන මැ  පමණි 

දුක් ගායනා මුමුනන්නේ නම් මා 
තවත් මගේ කාන්තාරයේ 
ඔබට ඇසෙන මායිමක සිට 
ඔබ ආ යුතු නො වේද මා වෙත 

ඔබ එන්නෙ නම් මා  වෙත 
මේ සංසාර දූවිලි පහවනු ඇත-දිනෙක 
ඔබ සමග මගේ යාගයකි - පිදෙන 
ඔබ හා ගෙතූ ගීයකි - ගැයෙන
ඔබ හා යන ගමනකි -අල්තාරය වෙත 
ඔබ අභියස කුරිසියකි -ඇණ  ගැසෙන 

පහන් එළි නැති -මල් පිපී නැති 
මාවතකි ඇත්තේ -මා දකින 
මගෙ  කෙස්රෝදත් කියයි කුමරිය  
මගේ සිරුරේ දුවිලිවල තරම

එක් රාගයක් පමණි  ගැයෙන්නේ -මේ දැන් 
එක් රාවයක් පමණි ඇසෙන්නේ  - මේ දැන් 
එක් හීනයක් පමණි දකින්නේ     - මේ දැන් 
ඒ ඔබ ගැන මැ  පමණි